Göng&brú er sjálfstætt rekstrar-, fjármögnunar- og eignarhaldsfélag í eigu íslenska ríkisins. Hlutverk félagsins er að undirbúa, hanna, fjármagna og annast framkvæmd stærri samgöngumannvirkja sem styðja við öruggar, skilvirkar og nútímalegar samgöngur á Íslandi.

Félagið er stofnað á grunni Vaðlaheiðarganga hf. og fer með eignarhald á Vaðlaheiðargöngum og innheimtu veggjalda um þau.

Göng&brú er innheimtuaðili veggjalda og þjónustugjalda í vegakerfinu. Starfsemin hvílir á sjálfbærri fjármögnun: félagið fjármagnar sig á almennum markaði án ríkisábyrgðar á lánum og án almennra rekstrarstyrkja.

Með sérhæfðri þekkingu á undirbúningi, fjármögnun og framkvæmd samgönguverkefna vinnur Göng&brú að því að skapa traustan grundvöll fyrir uppbyggingu mikilvægra innviða til framtíðar.

Göng og brú heldur alþjóðlegan kynningar- og markaðsdag í Hörpu 17. september klukkan 13:30.

Við munum kynna hlutverk og tilgang Ganga og brúar. Fjallað verður um þau innviðaverkefni sem félaginu verður ætlað að undirbúa, fjármagna og framkvæma á næstu árum og hvernig staðið verður að útboðum.

Dagskrá

Opnunarávarp
Kristrún Frostadóttir, forsætisráðherra

Göng og brú: Hlutverk
Eyjólfur Ármannsson, innviðaráðherra

Innviðir og samkeppnishæfni Íslands
Sigurður Hannesson, framkvæmdastjóri Samtaka iðnaðarins

Viðnámsþróttur, ábyrgð og vaxtargeta
Esther Finnbogadóttir, sérfræðingur í fjármögnun og skuldastýringu hjá fjármála- og efnahagsráðuneytinu

Kaffihlé 

Göng og brú: Kynning á félaginu
Guðmundur Daði Rúnarsson, forstjóri

Undirritun viljayfirlýsingar
Innviðaráðherra og forstjóri Ganga og brúar undirrita viljayfirlýsingu um uppbyggingu mikilvægra samgönguinnviða.

Kynning á útboðum
Stuart Cairns, meðeigandi hjá Bird & Bird

Lokaorð
Daði Már Kristófersson, fjármála- og efnahagsráðherra

Áætlað er að dagskrá ljúki um 15:30. Að henni lokinni verður boðið upp á léttar veitingar þar sem gestum gefst tækifæri til að ræða saman. Vakin er athygli á að viðburðurinn fer fram á ensku.

Göng og brú ohf. hefur ráðið Guðmund Daða Rúnarsson í starf forstjóra félagsins.

Göng og brú ohf. hefur ráðið Guðmund Daða Rúnarsson sem forstjóra félagsins. Ákvörðun um ráðninguna var tekin af stjórn félagsins að undangengnu opnu ráðningarferli. 

Guðmundur Daði tekur við stjórn félagsins á þeim tímamótum þar sem byggja þarf upp getu félagsins til að taka að sér uppbyggingu innviða sem munu auka öryggi og bæta samgöngur um land allt.

Guðmundur Daði býr yfir víðtækri reynslu af stjórnun, stefnumótun og framkvæmd umfangsmikilla innviðaverkefna og kemur til félagsins frá Isavia þar sem hann starfaði sem framkvæmdastjóri viðskipta og þróunar á Keflavíkurflugvelli. Guðmundur Daði sinnti fjölbreyttum stjórnunarstörfum hjá Isavia og leiddi uppbyggingu og framkvæmdir flugvallarins samfleytt frá 2016. Guðmundur Daði er verkfræðingur að mennt frá Danska Tækniháskólanum í Kaupmannahöfn.

„Ég er þakklátur fyrir traustið og hlakka til að leiða innviðafélagið Göng og brú. Mér líst vel á upplegg ríkisstjórnarinnar um að flýta uppbyggingu á stærri samgönguinnviðum með þessum hætti. Þá tel ég að reynsla mín frá Isavia af því að leiða uppbyggingu innviða og ljúka framkvæmdum á réttum tíma, og á kostnaðaráætlun, muni nýtast vel á þessum nýja vettvangi,“ segir Guðmundur Daði Rúnarsson nýráðinn forstjóri Ganga og brúar.

„Við hefjum leika strax í næstu viku með kynningar- og markaðsdegi Ganga og brúar þar sem verða fulltrúar frá fjölda erlendra og innlendra aðila. Ég veit að það er mikill áhugi á verkefnum félagsins og við förum hratt af stað.“